20.02.2026

Тәрбие сабағы
«Анадан хат»

Мақсаты:

Ананың балаға деген шексіз махаббатының қадірін түсіндіру;

Анаға деген құрмет пен ризашылық сезімін ояту;

Балалардың жүрегіндегі мейірімділік пен адамгершілікті арттыру.

Құндылықтар: Сүйіспеншілік, отбасы, құрмет

Сабақ барысы

I. Ұйымдастыру кезеңі

(Жай әуен қойылады)

Мұғалім:

Балалар, бүгін біз ең қымбат, ең жақын жан туралы әңгімелесеміз.

Ол – бізге өмір сыйлаған, біз ауырғанда жанымыздан табылатын, біз қуанғанда бірге қуана алатын жан.

Ол – Ана.

Көздеріңді жұмып, анаңның жүзін елестетіп көріңдер.

Оның мейірімді көзін, жылы құшағын, ананың иісін сезініңдер.

 

II. Кіріспе әңгіме «Ана махаббаты – мәңгілік»

Ана махаббаты – шексіз.

Ана ешқашан баласынан ештеңе күтпейді.

Ол тек баласының амандығын, бақытын тілейді.

Кейде ана шаршайды, кейде жылайды,

бірақ баласының жүрегі ауырмасын деп көз жасын көрсетпейді.

III. Рефлексия-ойын «Менің анам қандай?»

Оқушыларға жүрекше қағаз таратылады.

Тапсырма: «Менің анам…» деп бастап, бір сөзбен сипаттау.

IV. Маңызды түсіндіру сәті (барлық балаларға арналған)

Мұғалім:

Балалар, біз «ана» дегенде тек бір адамды ғана ойламауымыз керек.

Өмірде баланы жүрегімен өсіретін жандар бар.

Кейде ананың орнын әже басады.

Ана болу – тек дүниеге әкелу емес,

ана болу – жүрекпен тәрбиелеу.

Сондықтан бүгінгі хаттар –

аналардан және ананың орнын басқан ең қымбат жандардан келген хаттар.

V. Бейнефильм көрсету

«Ананың иісі»

Фильмнен кейін қысқаша ой бөлісу.

VI. Негізгі бөлім – «Анадан хат»

Мұғалім:

Балалар, қазір сендерге ерекше сыйлық беріледі.

Бұл – сендерді өсірген, сендер үшін уайымдаған жанның жүрек сөзі.

Бұл хаттарды жүректеріңмен оқыңдар.

(Балалар хатты оқиды)

VII. Қорытынды рефлексия

Сұрақтар:

Хатты оқығанда не сезіндің?

Анаңа немесе сені тәрбиелеген жанға қандай сөз айтқың келеді?

Қорытынды:

Ана жүрегі – ең қауіпсіз мекен.

Ана барда өмірде жылу бар.

Барлығы бірге:

«Анашым, мен сізді жақсы көремін!»